Қазақстанның футбол клубтарын сатып алғысы келетін олигархтардың есімдері белгілі болды
АЛМАТЫ. KAZINFORM – Қазақстандағы қазір мемлекетке тиесілі футбол клубтары жақын арада жеке инвесторлардың қолына өтуі мүмкін.
Президент Қасым-Жомарт Тоқаев бұған дейін мемлекеттік органдарға футбол клубтарын жекешелендіруді тапсырған еді. Премьер-министр Олжас Бектеновтің депутаттық сауалға берген жауабына қарағанда, Президент тапсырмасын орындау бойынша жұмыстар нәтижесін бере бастады.
Қазірдің өзінде футбол командаларын сатып алуға ниетті жеке компаниялар мен ірі бизнес өкілдері табылған.
– «Орталық Азия жанармай-энергетикалық компаниясы» АҚ (Сергей Кан) «Қызыл-Жар» клубын сатып алуға қызығушылық білдірді; Freedom Finance (Тимур Турлов) «Шахтер» клубына арналған жаңа стадион мен академия салуды көздеп отыр. Kaspi Group (Михаил Ломтадзе) – «Жеңіс» клубын сатып алып, Астанада футбол инфрақұрылымын дамытуға ниетті. TAU GROUP LTD (Ислам Қозбақов) «Қайсар» клубын сатып алуды жоспарлап отыр. Сондай-ақ «Тараз», «Елімай» және «Ертіс» клубтары бойынша да келіссөздер жүріп жатыр. Процесті жеделдету үшін Үкімет 2021-2025 жылдарға арналған кешенді жекешелендіру жоспарын жаңартып, құжатты мемлекеттік органдармен келісу кезеңінде, - делінген Премьер-министрдің жауабында.
Әзірше клубтар әлі сатылмаған, сондықтан олар мемлекеттік бюджет есебінен қаржыландырылып отыр. 2025 жылға футболға 34,9 млрд теңге қарастырылған, оның ішінде 31,8 млрд теңге – кәсіби клубтарға, 3,1 млрд теңге – балалар және бұқаралық спортқа бағытталған.
Алайда бұл қаражаттың жұмсалуы мұқият тексеріліп жатыр.
– 2021-2025 жылдар аралығында жүргізілген аудит нәтижесінде 12-ден астам тексеріс өтті. 100-ден астам заңбұзушылық анықталды, оның ішінде артық смета, қайталанған қызметтер мен тиімсіз шығындар бар. «Ақтөбе» және «Қызыл-Жар» клубтарында сыбайлас жемқорлық белгілері анықталған. Мысалы, Ақтөбе облысының прокуратурасы 250 млн теңгеден астам қаржының мақсатсыз жұмсалғанын анықтады. Оның ішінде ойыншыларға негізсіз бонус төлеу мен мердігерлердің бағаны көтеріп көрсетуі бар, - деп жазылған ресми жауапта.
Еске салайық, бұған дейін Премьер-министр Олжас Бектенов Туризм және спорт министрлігіне тез арада Алматы тау кластерін дамыту жоспарын жаңартуды және футбол клубтарын жекешелендірудің жоспар-кестесін әзірлеуді тапсырғанын хабарлағанбыз.
