Қазақстан халқы Ассамблеясына 30 жыл: Бүкіл облыста естелік тақталар ашылды
АСТАНА. KAZINFORM – Астанадағы Бейбітшілік және келісім сарайына Алғыс айту күніне арналған форум өтіп, Қазақстан халқы Ассамблеясының 30 жылдығы ресми ашылды.
Салтанатты іс-шара аясында облыс орталықтары мен республикалық маңыздағы қалаларда орналасқан Достық үйлерінде, бір мезетте ҚХА 30 жылдығына арналған естелік тақталар ашылды.
- Барлық өңірлерде ҚХА 30 жылдығына арналған естелік тақтаның ашылу рәсімі болады. Біз ол естелік тақтаның бірыңғай сызбасын жасап, бүкіл өңірлерге жолдағанбыз. Бүгін осы тақталар бүкіл облыс орталықтарындағы, Астана қаласындағы Достық үйлерінде, ашылады. Біз де өз естелік тақтамызды ашамыз, оны республикалық достық үйіне беретін шығармыз. Бұл естелік тақтаның көлемі әр жерде әр түрлі болуы мүмкін. Менің білуімше біз жаңа ғана ашқан тақта Астанадағы Достық үйіне ілінетін орынның көлеміне қарай жасалған. Бүгін өңірлерде ҚХА 30 жылдығына арналған челендждер мен форумдар өтіп, түрлі жобалардың тұсауы кесіледі, - дейді ҚХА төрағасының орынбасары Марат Әзілханов.
Форумнан шыққан қауым «Қазақ еліне алғыс» монументіне барып қазақ халқына алғыс ретінде символикалық гүл шоғын қойды.
- Бұл жолғы іс-шараға өңірлерден ешкімді шақырған жоқпыз. Тіпті Астана қаласындағы Ассамблея мүшелерінің бір тобы ғана осында жүр. Қалғандары өзге өңірлердегі әріптестерімен бірге Достық үйлерінде салтанатты шаралар өткізіп жатыр. Дегенмен бәріміз онлайн режимде байланыстамыз деуге болады. Телеарналарда қазір телемарафон өтіп жатыр. Осыдан тура 30 жыл бұрын Қазақстан халқы Ассамблеясы құрылды. Бұл тәуелсіздіктің алғашқы жылдарында елдегі тұрақтылықты пен татулықты сақтау үшін қабылданған маңызды шешім болды. Ассамблея – қоғамда этностар арасындағы сыйластық пен түсіністікті қамтамасыз ететін, ел бірлігін нығайтатын бірегей институт, - деді ҚХА төрағасының орынбасары.
Айта кету керек, Қазақстан халқы Ассамблеясының құрылғанына 30 жыл толып отыр.
