Қазақстан таза энергия өндірісінде әлемде маңызды рөл атқарады – Қасым-Жомарт Тоқаев
САМАРҚАНД. KAZINFORM – Біздің еліміз әлемдегі ядролық отынның 40 пайызға жуығын қамтамасыз ету арқылы таза энергия өндірісінде маңызды рөл атқарады. Бұл туралы «Орталық Азия - Еуропа Одағы» саммитіне қатысқан Президент Қасым-Жомарт Тоқаев мәлім етті, деп хабарлайды Kazinform агенттігінің меншікті тілшісі Әлихан Асқар.
– Қазақстан декарбонизация бастамаларын белсенді жүзеге асырып келеді. Біздің еліміз әлемдегі ядролық отынның 40 пайызға жуығын қамтамасыз ету арқылы таза энергия өндірісінде маңызды рөл атқарады. Ұлттық стратегияға сай, энергетикалық қауіпсіздікті қамтамасыз ету және көміртегі қалдықтарының көлемін азайту мақсатында атом электр станцияларын салуды жоспарлап отырмыз, - деді Президент.
Мемлекет басшысы былтыр Қазақстанда Климаттың өзгеруі және жасыл энергетика бойынша Жобалық кеңсе ашылғанын атап өтті.
– Бұл бастама су ресурстарын басқару, жаңартылатын энергия көздерін дамыту, климаттың өзгеруіне бейімделу және биоалуандылықты сақтау бағыттарында тиімді шешім іздеуге арналған. Аталған міндеттерді сәтті орындау үшін еуропалық серіктестірімізбен бірге тығыз қарым-қатынаста жұмыс істеуге ниеттіміз, - деді Қасым-Жомарт Тоқаев.
Айта кетейік, Өзбекстанның Самарқанд қаласында «Орталық Азия - Еуропа Одағы» форматындағы алғашқы саммит басталды.
Бұған дейін Мемлекет басшысы Қасым-Жомарт Тоқаев «Орталық Азия – Еуропа Одағы» саммитіне қатысу үшін «Конгресс-орталыққа» келгенін жазып едік.
Бұрын хабарлағанымыздай, кеше Президент Қасым-Жомарт Тоқаев Өзбекстанға жұмыс сапарымен келді. Оның барысында Мемлекет басшысы Еуропалық кеңес президенті Антониу Кошта, Еуропалық комиссия президенті Урсула фон дер Ляйен, Еуропалық қайта құру және даму банкінің президенті Одиль Рено-Бассомен екіжақты кездесулер өткізді.
