Қазақстанда Рим жарғысы ратификацияланатыны рас па

АСТАНА. KAZINFORM — ҚР Бас прокуратурасы Халықаралық қылмыстық соттың (ХҚС) Рим жарғысы ратификацияланатыны туралы ақпаратты жоққа шығарды, деп хабарлайды Kazinform агенттігінің тілшісі.

Бұған дейін қазақстандық Telegram-арналарда Қазақстанның Рим статутын ратификациялауға ниетті екені туралы ақпарат тараған болатын.

— Қазақстан Республикасының Бас прокуратурасы бұл халықаралық құжатты ратификациялау бойынша ешқандай жұмыс жүргізіп жатқан жоқ, — деп хабарлады ведомство Kazinform-ның ресми сауалына берген жауабында.

Рим статуты — Халықаралық қылмыстық сот қызметінің негізін қалыптастыратын халықаралық келісім. Ол 1998 жылы 17 шілдеде қабылданған және соттың функцияларын, юрисдикциясын және құрылымын айқындайды.

Халықаралық қылмыстық сот — халықаралық бейбітшілік пен қауіпсіздікке қатер төндіретін ең ауыр қылмыстарға жауапты адамдарды қудалаумен айналысатын тарихтағы алғашқы тұрақты халықаралық сот органы. Бұл сот 2002 жылы Рим статутының негізінде (яғни, ұйымның жарғысы) құрылған.

Айта кетейік, жуырда АҚШ Халықаралық қылмыстық сотқа қарсы санкциялар енгізді.