Қазақстанның Мемлекеттік хатшысы БҰҰ саммитіне қатысу үшін Нью-Йоркке келді
НЬЮ-ЙОРК. Қыркүйектің 23-і. ҚазАқпарат /Әлия Алтынғазина/ - БҰҰ Бас Ассамблеясының 64-ші сессиясының жұмысына қатысу үшін сейсенбі күні Нью-Йоркке Қазақстан Республикасының Мемлекеттік хатшысы - Сыртқы істер министрі Қанат Саудабаев келді.
Сапар бағдарламасында Ядролық сынақтарға жаппай тыйым салу туралы келісімшарттың күшіне енуіне қолдау көрсету жөніндегі конференцияда және жалпысаяси жарыссөздерде сөз сөйлеу жоспарланып отыр. Қ.Саудабаев сондай-ақ БҰҰ Бас хатшысы Пан Ги Мунмен, Ресей мен Қытайдың сыртқы істер министрлерімен, АҚШ Мемлекеттік хатшысымен және АҚШ-тың Ауғанстан және Пәкістан бойынша арнайы елшісімен кездеседі.
Сондай-ақ Мемлекеттік хатшы БҰҰ Қауіпсіздік кеңесінің ядролық қарусыздану және оларды таратпау мәселелері жөніндегі жоғары деңгейдегі мәжілісіне, Ислам Конференциясы Ұйымы министрлерінің кездесуіне қатысады.
Қыркүйектің 22-27-сі аралығына Қ.Саудабаевтың БҰҰ-ның Еуропалық экономикалық комиссиясының атқарушы хатшысы Ян Кубишпен, сыртқы істер жөніндегі еуропалық комиссар Бенита Ферреро-Вальднермен, БҰҰ елдерінің сыртқы істер министрлерімен екіжақты кездесулері жоспарланған.
