«ҚазМұнайГаз» комиссиясы Атырау мұнайын өңдеу зауытын тексеруді бастады

АТЫРАУ. KAZINFORM — «ҚазМұнайГаз» ҰК тарапынан құрылған арнайы комиссия Атырау мұнай өңдеу зауытында тексеру жұмысын бастады. Арнайы комиссия құрамына енген мамандар әлеуметтік желіде жарияланған кәсіпорын туралы ақпаратты жан-жақты зерттейді.

«ҚазМұнайГаз» ҰК АҚ басқарма төрағасының орынбасары Дмитрий Макеевтің айтуынша, Атырау мұнай өңдеу зауытының өндірістік, қаржы және құқықтық қызметіне толық тексеру жүргізілетін болады. Компания барлық туындаған мәселені зауыт қызметкерлерімен ашық талқылауға дайын.

«Бүгін кәсіпорында өндіріс мәселелеріне арналған кеңес өткізді. Жиында зауыттың жұмыс істеп тұрғаны және мұнай өнімдерін штаттық режимде жөнелтіп жатқаны атап өтілді. Компания тарапынан Атырау мұнай өңдеу зауытының өндірістегі қызметкерлері үшін тиісті жағдай жасау үшін барлық қажетті шаралар қабылданып жатыр. Арнайы комиссия қалыптасқан жағдайды объективті түрде қарастырады. Кәсіпорын ұжымының бүгінгі таңдағы басты талабы — үздіксіз өндірісті қамтамасыз ету және жөнелту қарқынын сақтап қалу», -деді Дмитрий Макеев.

Еске сала кетелік, бұдан бұрын Атырау мұнай өңдеу зауытындағы жағдай бойынша жұмыс тобы құрылғанын хабарланған еді.