Кейн Гарднер: Қазақстан боксшылары өте мықты екенін білемін
АСТАНА. KAZINFORM — Англиялық кәсіпқой боксшы Кейн Гарднер (17-4, 7КО) және Оңтүстік Африка өкілі Азинга Фузиле (18-2, 12КО) Астанада өткен «Battle of the Brave» кәсіпқой бокс кешіне арналған баспасөз конферанциясына қатысып, қазақстандық боксшылар туралы ойын айтты.

Кейн Гарднер қазақстандық боксшылардың мықты екенін айтты.
- Сәлем баршаңызға. Мен Қазақстан боксы туралы жақсы білемін, сіздер бұл спортта өте мықтысыздар, керемет боксшыларыңыз көп. Осында келгеніме өте қуаныштымын. Жалпы, қазақ боксшылары өте мықты екенін білемін, - деді ол.

Азинга Фузиле 2014 жылы қазақстандық боксшыдан жеңіліп қалғанын еске алды.
- Мен Қазақстан туралы ең алғаш рет 2014 жылы білдім. Сол жылы, қазақстандық қарсыласпен жұдырықтасып, жеңіліс таптым. Иә, Қазақстан боксының мықты екенінен хабарым бар, - деді оңтүстік африкалық боксшы.
Еске сала кетсек, Жәнібек Әлімханұлы 5 сәуір күні Астана қаласында кезекті жекпе-жегін өткізіп, чемпиондық белдіктерін қорғайды. Кәсіпқой бокс кеші елордадағы «Барыс арена» спорт кешенінде өтеді.
Осыған дейін хабарлағанымыздай, жеңіліп көрмеген қазақстандық боксшы Сұлтан Заурбек (19-0, 13КО) Оңтүстік Африка өкілі Азинга Фузилемен, ал Батыр Жүкембаев (23-1, 17КО) англиялық Кейн Гарднермен қолғап түйістіреді.