Қырғызстанға жанар-жағармай жеткізетін қытайлық жүргізушілердің кіру тәртібі жеңілдетілді
АСТАНА. KAZINFORM — Қырғызстанда мұнай өнімдерін мемлекеттік шекара арқылы автокөлікпен тасымалдауға арналған уақытша арнайы визасыз тәртіп енгізілді, деп хабарлайды Kazinform агенттігінің Бішкектегі меншікті тілшісі.
Министрлер кабинеті Қырғызстанға мұнай өнімдерін автомобильмен тасымалдайтын Қытай азаматтары үшін елге визасыз кірудің уақытша арнайы тәртібін белгілейтін қаулы қабылдады.
Бұл шара елдің экономикалық қауіпсіздігін нығайтуға, халықты жанар-жағармаймен үздіксіз қамтамасыз етуге және ұлттық экономика субъектілеріне мемлекеттік қолдау көрсету мақсатында қабылданды.
Құжатқа сәйкес, Қытай азаматтары мұнай өнімдерін жеткізу үшін Қырғызстан Республикасының территориясында 5 күн ішінде визасыз жүре алады.
Белгіленген мерзім аяқталғаннан кейін аталған азаматтар Қырғызстан аумағында болуын жалғастырған жағдайда, оларға сыртқы көші-қон саласындағы жалпы заңнама талаптары қолданылады.
Бұған дейін Қырғызстанның жанар-жағармай материалдарын импорттаушылар үшін субсидияларды 2026 жылдың 31 желтоқсанына дейін ұзартқаны хабарланған болатын. Сондай-ақ елде Еуро-5 стандартына сай отын өндіру жоспарланып жатқаны туралы жазған едік.
Ақзат Бақытжанқызы
