Қытай банктері Ресеймен саудада қиындыққа ұшырады

АСТАНА. KAZINFORM — Америка Құрама Штаттарының ықтимал қаржылық санкцияларына тап болған Қытайдың ірі банктері Қытай мен Ресей арасындағы транзакцияларды тексеруді күшейтіп, Қытай-Ресей ірі сауда тапсырыстарынан бас тартты. Сондықтан қытайлық экспорттаушылар шекарадағы шағын банктер және астыртын қаржыландыру арналары арқылы есеп айырысуға мәжбүр.

Reuters агенттігінің хабарлауынша, Ресей-Украина соғысы басталғаннан бері АҚШ Ресей мен ресейлік құрылымдарға бірқатар санкциялар енгізген.

Енді АҚШ Қытайдың банк секторына санкция салуды жоспарлап отыр. Себебі, Вашингтон Қытай Ресейдің қорғаныс өнеркәсібін қолдайды деп санайды.

Reuters-нің айтуынша, Қытайдың Гуандун провинциясында орналасқан электр құрылғыларын өндіруші кәсіпорынның өнімін Ресейге жөнелтуде қиындық тудырғаны атап өтілді, себебі бұл өнімде мәселе болғаны емес, қытайлық банктердің транзакция төлемдеріне шектеу қойғаны.

Бұл компанияның негізін қалаушы Ван мырзаның айтуынша, қазір ірі банктерге Ресейден төлемдерді алу үшін бірнеше ай қажет.

Сондықтан олар Қытай-Ресей шекарасындағы аймақтарда белсенді валюта брокерлерін төлемдерді шешу үшін пайдалану мүмкіндігін қарастырып жатқанын айтты.

Гуандундағы электроника компаниясының менеджері Қытайдың барлық ірі банктері наурыз айының басынан бері Ресеймен есеп айырысуды тоқтатқанын жеткізді. 

Ал Цзянсу провинциясындағы химиялық машина жасау компаниясының Лю есімді қызметкері Цзилинь Хунчун ауылдық коммерциялық банкінде есепшот ашу үшін үш ай бойы кезекте тұрғанын айтты.

Wall Street Journal осы айдың 22-сі күні осы мәселемен таныс адамдарға сілтеме жасап, АҚШ санкция жобасын әзірлеп жатқанын және кейбір қытайлық банктерді әлемдік қаржы жүйесінен шығарамыз деп қорқытқанын хабарлады.

Кейінірек Reuters агенттігі АҚШ-тың анонимді шенеуніктеріне сілтеме жасап, Америка Құрама Штаттары бастапқыда кейбір қытайлық банктерге санкция салуды талқылағанын, бірақ мұндай шараларды жүзеге асыру жоспарын әлі жасамағанын хабарлады.