Қытай халқының 95%-ы базалық медициналық сақтандырумен қамтылған
АСТАНА. KAZINFORM — 2025 жылдың соңындағы жағдай бойынша Қытайда 1,33 миллиардтан астам адам базалық медициналық сақтандыру жүйесімен қамтылған. Бұл ел халқының шамамен 95 пайызын құрайды, деп хабарлайды Синьхуа.
Бұл туралы Қытайдың Мемлекеттік медициналық қамтамасыз ету басқармасы жариялаған ресми статистикалық деректерде айтылған. Мәліметтерге сәйкес, жүйеде тіркелген адамдар саны бір жыл ішінде 4,06 миллионға артқан.
Ведомствоның дерегінше, 2025 жылы ұлттық базалық медициналық сақтандыру жүйесі аясындағы қор түсімдері, соның ішінде ана болуды сақтандыруды қоса есептегенде, жалпы көлемі шамамен 3,59 триллион юаньға (шамамен 520 млрд АҚШ доллары) жетті. Ал қордың жалпы шығыны 3 триллион юань шамасында болған.
2025 жылы ел бойынша амбулаториялық ем алу үшін дәрігерлерге жүгіну саны 7,215 миллиард рет тіркеліп, өткен жылмен салыстырғанда 25,51 пайызға артқан. Ал стационарлық емдеу қызметіне жүгіну 278 миллион рет болып, бұл көрсеткіш 3,4 пайызға төмендеген.
Ведомство мәліметінше, базалық медициналық сақтандыру жүйесі босану шығындарын азайтуға да ықпал етіп отыр. 2025 жылдың соңында Қытайда шамамен 260 миллион адам ана болуды сақтандыру жүйесімен қамтылған. Бұл бір жыл бұрынғыдан 6,66 миллион адамға көп.
2025 жылдың басынан бастап елде кейбір көмекші репродуктивтік процедуралар — мысалы, жұмыртқа жасушасын алу және жасанды ұрықтандыру — базалық медициналық сақтандыру жүйесі арқылы өтелетін қызметтердің қатарына енгізілді. Сонымен қатар провинциялық деңгейдегі 30 өңірде босану кезіндегі жансыздандыру да осы жүйе арқылы қамтыла бастады.
Деректерге сәйкес, 2025 жылы базалық медициналық сақтандыру жүйесі 3 миллионнан астам көмекші репродуктивтік процедураны қаржыландырып, ел бойынша 1,6 миллионнан астам адамға көмек көрсеткен.
Сонымен қатар, Қытайдың ауылдық аймақтарында табысы төмен тұрғындардың және кедейліктен шыққан азаматтардың 99 пайыздан астамы базалық медициналық сақтандыру жүйесімен қамтылған.
Өткен жылы Қытайдың жаңартылған мемлекеттік медициналық сақтандыру тізіміне 114 жаңа дәрі-дәрмек енгізіліп, жалпы саны 3 253 атауға жетті.
2025 жылы билік медициналық сақтандыру қорлары қаражатын мақсатсыз пайдаланудың 34,2 миллиард юань көлеміндегі фактілерін анықтаған. Қадағалау нәтижесінде алаяқтық пен сақтандыруды теріс пайдалануға қатысы бар 1 626 мекеме анықталды.
Тексеру барысында дәрі-дәрмектерді қадағалау кодтары қолданылып, ұлттық медициналық сақтандыру жүйесіне қосылған 124,7 мың медициналық және фармацевтикалық мекеме тексерілді. Нәтижесінде заң талаптарын бұзған 39,1 мың мекемеге қатысты шара қолданылды.
Осыдан бұрын Қытай сал ауруы кезінде қол қозғалысын қалпына келтіру үшін ми имплантын мақұлдағаны анықталды.
