Қытай Таяу Шығыстағы қақтығысты реттеуде делдал болуы мүмкін
АСТАНА. KAZINFORM — Иранның сыртқы істер министрі Аббас Арагчи Al Jazeera телеарнасына берген сұхбатында Бейжіңнің Таяу Шығыстағы қақтығысты реттеуде делдал болуы мүмкін екенін айтты, деп хабарлайды Kazinform агенттігінің Бейжіңдегі меншікті тілшісі.
Сұхбатта ирандық дипломаттан қақтығысқа ықпал ете алатын елдер туралы сұрақ қойылды. Әсіресе Қытай дағдарысты реттеуге қолайлы жағдай жасап, арағайын бола ала ма деген мәселе көтерілді.
Аббас Арагчидің сөзінше, Қытай мұндай рөлді атқара алатын санаулы елдің бірі екенін айтты.
— Қытай Иран мен Сауд Арабиясы арасында позитивті және сәтті делдал болған, және мен екі ел де ҚХР делдалдығы арқылы қол жеткізілген келісімдерді сақтап отырғанына сенімдімін, — деп атап өтті ол.
Оның айтуынша, Қытай сөзсіз айтарлықтай әлеуетке ие және басқа елдердің де осындай мүмкіндіктері бар. Ол Иран тарапы Тегеранның талаптары мен шарттарына сай келетін кез келген идеяны тыңдауға дайын екенін атап өтті.
Осыған дейін Иран билігі Ұлттық қауіпсіздік жоғары кеңесі хатшысының қаза тапқанын растағанын жаздық.
