Қызылордада сайлаушыларды робот қарсы алды
ҚЫЗЫЛОРДА. KAZINFORM — Республикалық Құрылтай сайлауында Қызылорда қаласындағы № 200 сайлау учаскесінде сайлаушыларды робот қарсы алды. Бұл туралы облыстық аумақтық сайлау комиссиясы хабарлады.
Заманауи технология элементі ретінде енгізілген робот келушілерге Құрылтай сайлауы туралы қысқаша ақпарат беріп, дауыс беру тәртібі жөнінде мәлімет ұсынды.
— Робот көмекші балаларымен бірге дауыс беруге келген сайлаушыларға ерекше көңіл-күй сыйлады. С. Толыбеков атындағы № 3 мектепте орналасқан сайлау учаскесінде 1103 сайлаушы дауыс беруге құқылы, — делінген хабарламада.
Айта кетейік, өңірде 386 учаске құрылып, 2720 комиссия мүшесі қызмет атқарып жатыр. Аймақта 500 591 азамат дауыс беру құқылы.
Ал Ұлытау облысы, Ұлытау ауданындағы № 123 сайлау учаскесінде келушілерді ерекше кейіпкер — Ұлытаудың табиғи болмысын бейнелейтін «Ұлар» құсы қарсы алды.
