Кімдер әлеуметтік көмекті үйде тегін алуға құқылы

ПЕТРОПАВЛ. KAZINFORM — Әлеуметтік қызметкерлер ауруына, жарақатына, жасына немесе мүгедектігіне байланысты өздеріне күтім жасау, жүріп-тұру қабілетінен толық немесе ішінара жоғалтқан адамдарға көмектеседі.

Қазақстанда үйде арнайы әлеуметтік қызметтер алатын азаматтардың санатына:

— Зейнеткерлік жасқа толған қарт адамдар, сондай-ақ өз бетінше жүріп-тұра алмайтын және тұрақты күтімді қажет ететін I және II топтағы мүгедектігі бар адамдар жатады. Заң бойынша оларға қамқорлық жасауға міндетті еңбекке қабілетті кәмелетке толған балалары (жұбайы/зайыбы) болмаған кезде қызмет көрсетіледі.

Егер туыстары объективті себептермен көмек көрсете алмаса, мәселен:

— I немесе II топтағы мүгедектігі бар болса,

— онкологиялық немесе психикалық аурулардан зардап шексе,

— бас бостандығынан айыру орындарында болса,

— психикалық денсаулық орталығында есепте тұрса,

— шетелге тұрақты тұруға кетсе,

— басқа елді мекенде тұрса (жұбайы/зайыбы үшін жасы да ескеріледі) қолдау жасалуы мүмкін.

Сондай-ақ, психоневрологиялық аурулардан зардап шегетін мүгедек балаларға, тірек-қимыл аппараты бұзылған мүгедектігі бар балаларға және психоневрологиялық аурулары бойынша мүгедектігі бар ересектерге (18 жастан асқан) қызмет көрсетіледі.

Бұған дейін Қазақстанда кім тісін тегін емдете алатындығын жаздық.

Сондай-ақ елімізде тегін ота кімдерге жасалатындығын, ақылы жолдарында кімдер тегін жүре алатындығын және елордада ақылы автотұрақты кімдер тегін пайдалана алатындығын да біле аласыз.