Қорғаныс министрінің орынбасары Ақтөбе облысында тікұшақ апатына қатысты түсінік берді
АСТАНА. KAZINFORM — ҚР Қорғаныс министрінің орынбасары Шайх-Хасан Жазықбаев Ақтөбе облысында тікұшақ апатына қатысты түсінік берді.
Оның айтуынша, бұл оқиға бойынша қызметтік тексеру басталған.
«Осы ретте апатқа не себеп болғаны анықталып жатыр. Әртүрлі нұсқалар тексеріліп отырғанын айта аламын. Басты нұсқа ретінде техникалық ақау қарастырылып жатыр», — деді Шайх-Хасан Жазықбаев Сенаттың жалпы отырысынан кейін тілшілер сұрағына жауап бере отырып.
Еске салсақ, өткен аптада Ақтөбе облысы Мәртөк ауданы аумағында тікұшақ апатқа ұшырап, жанып кетті. Бортта үш адам болған.
«Оқиға орнына ТЖД жеке құрамынан 23 адам мен 5 бірлік техника жіберілді. Оқиға орнына келген ТЖМ құтқарушылары өртті сөндірді. МИ-8 тікұшағының бортында 3 адам болған. Олардың біреуі қайтыс болды. Зардап шеккен екі адам Ақтөбе қаласына ҚР ҚМ ЯК-40 ВОСВОД ұшағымен жеткізілді», — деп хабарлады ҚР ТЖМ.
