ҚПЛ: «Елімай» командасы «Ұлытаудан» ірі есеппен басым түсті

АСТАНА. KAZINFORM - Футболдан Премьер-лига командалары арасындағы Қазақстан чемпионатының төртінші туры мәресіне жетті.

Аталған турды семейлік «Елімай» мен жезқазғандық «Ұлытау» командалары түйіндеді.

Кездесу барысында семейлік клуб ойын тізгінін бірден қолға алуға тырысты. Дегенмен оған ұлытаулық команда тойтарыс берді. Десе де 44-минутта «Елімай» сапынан Фессу Плакка мергендігімен көзге түсті.

Екінші кезеңде олардың қатарынан Фейсала Мулич 74, Әділбек Жұмаханов 93-минутта басымдықты арттыра түсті. Осылайша семейлік клуб қарсыласынан 3:0 есебімен басым түсті.

Аталған жеңістен кейін «Елімай» 7 ұпаймен бесінші орынға көтерілсе, «Ұлытау» небәрі екі ұпаймен көш соңында қалып қойды.

Аталған турда 5 сәуірде «Астана» командасы «Ордабасыны» 2:1, «Тұран» «Қызылжарды» 3:2, «Тобыл» «Оқжетпесті» 1:0 есебімен тізе бүктірсе, талдықорғандық «Жетісу» мен астаналық «Жеңіс» 0:0 есебіне қанағат білдірді.

Бүгін «Қайрат» командасы «Атырауды», «Ақтөбе» футбол клубы «Қайсарды» 4:1 есебімен тізе бүктірді.