ҚР Премьер-Министрі «ЭКСПО-2010» ресми ашылу салтанатына қатысады

ШАНХАЙ. Сәуірдің 30-ы. ҚазАқпарат /Руслан Сүлейменов/ - Бүгін Шанхайда жергілікті уақытпен сағат кешкі 20:10-да «ЭКСПО-2010» бүкіләлемдік көрмесінің ашылуы салтанаты басталады. Шанхайдағы көрменің ашылуына 20 мемлекет пен үкіметтер басшылары, соның ішінде Қазақстан Премьер-Министрі Кәрім Мәсімов қатысады.

Қытай басшылығының мәлімдеуінше, ЭКСПО - Бейжіңдегі 2008 жылғы Олимпиада ойындарынан кейінгі маңызды халықаралық оқиғалардың бірі. Шанхай қаласы өкімет орындары өкілдерінің айтуынша, ЭКСПО-2010 көрмесіне тікелей мемлекеттік және жеке инвестицялар 4,2 млрд. АҚШ долларын құраған.

Белгілі болғандай, ЭКСПО-2010 ашылу салтанатында лазерлік және электр-акустикалық технологиялар пайдаланылып, отшашу жасалады.

Мамырдың 1-інде ЭКСПО-парктің ашылу салтанаты болады. Салтанатта Халықаралық көрме бюросы мен ҚХР басшылары сөз сөйлеп, бірге көрме сөресінің түймесін басады.

Шанхай арқылы өтетін Хуанпу өзенінің қос жағалауында салынған ЭКСПО-парктің ауданы 5,28 мың шаршы километр. ЭКСПО-2010 аумағында 140-қа тарта әртүрлі павильондар орналасқан. Олардың арасында 42 елдің өз павильондары бар, сонша павильон жалға берілген, 11 бірлескен және 18 корпорациялар павильондары бар.

ЭКСПО-2010 өткізу кезеңінде онда 70 млн. қытайлық және шетелдік туристер болмақ, күніне орташа есеппен 400 мың адам болады деп күтілуде.