ҚР Үкіметінде Еуропалық қайта құру және даму банкінің қатысуымен 2010-2014 жылдарға арналған жеделдете индустриялық-инновациялық дамыту мемлекеттік бағдарламасының жобаларын жүзеге асыру перспективалары қаралды
СТАНА. Ақпанның 16-сы. ҚазАқпарат - Бүгін Үкімет үйінде Қазақстан Республикасының Премьер-Минстрі Кәрім Мәсімов Еуропалық қайта құру және даму банкінің (ЕҚДБ) Оңтүстік-Шығыс Еуропа, Кавказ және Орта Азия елдері бойынша бас директоры Оливье Декамппен кездесті,
деп хабарлады Үкімет басшысының баспасөз қызметі.
Кездесу барысында Қазақстан мен ЕҚДБ арасындағы ынтымақтастық мәселелері талқыланды. Атап айтқанда, ЕҚДБ-ның Қазақстанның идустрияландыру, әртараптандыру және инновациялық даму бағдарламаларын жүзеге асыруға қатысу мүмкіндігі мәселелері бойынша пікір алмасылды.
Тараптар ЕҚДБ-ның 2010-2014 жылдарға арналған жеделдете индустриялық-инновациялық даму мемлекеттік бағдарламасына, орнықты энергетиканы дамыту шараларына, сондай-ақ Қазақстанның жеке кәсіпкерлігін дамыту бағдарламасына қатысуының перспективаларын қарады.
Бұдан басқа, 2011 жылы Астана қаласында өтетін ЕҚДБ басқарушыларының жыл сайынғы 20-шы жиналысына әзірлік мәселелері талқыланды.
Кездесу соңында К.Мәсімов пен О.Декамп Қазақстан мен ЕҚДБ арасындағы ойдағыдай және жемісті ынтымақтастықтың жалғасатынына сенім білдірді.
