Күрдістан жұмысшы партиясы Түркия үкіметімен бітімге келетінін жариялады

АСТАНА. KAZINFORM – Күрдістан жұмысшы партиясы (Қазақстанда тыйым салынған - ред.) 1 наурыз күні Түркия үкіметімен бітімге келетінін жариялап, 40 жылға созылған «автономия үшін күресті» аяқтайтынын мәлімдеді. Бұл туралы сингапурлық Lianhe Zaobao басылымы хабарлады.

Ұйымға тәуелді қарулы күштер түрмеде отырған партия жетекшісі Абдулла Ожаланның үндеуіне сай атыс-шабысты тоқтатып, қаруларын тастамақ және толықтай таратылмақ.

Сонымен қатар КЖП (Қазақстанда тыйым салынған - ред.) Түркия үкіметінен Ожаланды босатуды талап етіп отыр. Мәлімдемеде тек Ожаланның басшылығымен ғана бітімге келуге және қарусыздандыруға қол жеткізуге болатыны баса айтылған.

Ожалан 27 ақпан күні жасаған мәлімдемесінде партияластарын қару тастауға шақырып, КЖП өздігінен таратылуы қажет екенін мәлімдеген әрі осы үшін тарихи жауапкершілікті өз мойнына алуға дайын екенін айтқан.

Басылымның жазуынша, Ожалан 1999 жылы Түркия үкіметіне қолды болып, Ыстанбұл маңындағы Имралы аралындағы түрмеге қамалған. 2012 жылдың қазан айынан бері Түркия үкіметі Ожаланмен «Күрдістан мәселесін» шешуге бағытталған бейбітшілік келіссөзін жүргізіп келеді.

КЖП 1979 жылы құрылған. Ұйым «қарулы күрес» арқылы Түркия, Ирак, Иран және Сирия шекаралары түйілісетін аймақта тәуелсіз «Күрдістан мемлекетін» орнатуды көздейді. Әлемнің көптеген елі КЖП-ны лаңкестік ұйым деп таниды.

Израиль премьер-министрі тәуелсіз Күрдістан мемлекетін құру идеясын қолдағанын жазған болатынбыз.