Қызылорда облыстық ішкі саясат басқармасына жаңа басшы тағайындалды
ҚЫЗЫЛОРДА. ҚазАқпарат - Қызылорда облысы әкімінің 2015 жылғы 8 қыркүйектегі өкімімен Жазира Жақсылыққызы Жылқышиева Қызылорда облыстық ішкі саясат басқармасының басшысы лауазымына тағайындалды. Бұл туралы облыстық әкімдіктің баспасөз қызметінен хабарлады.
Жазира Жылқышиева 1970 жылы Қызылорда облысы Жалағаш ауданында дүниеге келген. 1992 жылы Қорқыт Ата атындағы Қызылорда педагогикалық институтын - физика пәнінің мұғалімі, 2005 жылы «Болашақ» университетін - заңгер мамандықтары бойынша бітірген.
Еңбек жолын 1992 жылы Жалағаш ауданындағы № 31 орта мектептің физика пәнінің мұғалімі ретінде бастаған. 1992-2001 жылдары Жалағаш ауданындағы № 202 орта мектеп директорының тәрбие ісі жөніндегі орынбасары, Жалағаш ауданындағы № 31 орта мектеп директорының тәрбие ісі жөніндегі орынбасары, 2001-2005 жылдары Қазақстан Республикасы Мемлекеттік қызмет істері жөніндегі агенттігінің Қызылорда облысы бойынша басқармасында бас маман, Қызылорда облысының жолаушылар көлігі және автомобиль жолдары басқармасында бөлім бастығы, 2005-2007 жылдары Қазақстан Республикасы Мемлекеттік қызмет істері жөніндегі агенттігінің Қызылорда облысы бойынша басқармасында бөлім бастығы, Қызылорда облыстық ішкі саясат департаменті директорының орынбасары, 2007-2011 жылдары Қызылорда облысы әкімі аппаратының кадр жұмысы бөлімінің меңгерушісі қызметтерін атқарған. 2011 жылдан осы кезге дейін Қызылорда облысының жұмыспен қамтуды үйлестіру және әлеуметтік бағдарламалар басқармасының басшысы қызметін атқарып келді. «Әлеуметтік-еңбек саласының үздігі» төсбелгісімен наградталған. Осы кезге дейін Қызылорда облыстық ішкі саясат басқармасының басшысы қызметін атқарып келген Ғайнолла Зейноллаұлы Жарқынбаев Қызылорда облысы әкімінің кеңесшісі лауазымына тағайындалды.
