Қызылордада ауыр атлетикаға арналған спорт кешені салынады

ҚЫЗЫЛОРДА. ҚазАқпарат - Облыс орталығында ауыр атлетикаға арналған спорт кешені салынады. Бұл туралы бүгін Қызылорда облысының әкімі Қырымбек Көшербаевтың төрағалығымен өткен сәулет-қала құрылысы кеңесінде айтылды, деп хабарлайды облыс әкімдігінің баспасөз қызметінен.

Сыр өңірінде ауыр атлетика жақсы дамып келеді. Кешен құрылысы аяқталса, Қызылордада талантты зілтеміршілердің қатары артатыны анық. Спорттық нысан Е.Демесінов пен Ш.Есенов көшелерінің қиылысында орналасады. Екі қабатты ғимараттың сыртқы келбеті қалайыдан жасалған ақ және ашық қоңыр түсті фасадтық кассеталармен, ал іргетасы қоңыр түсті мәрмәр плиткалармен қапталады. Жалпы, мұнда 3 жаттығу және сайыс өткізуге арналған бір зал болады. Емдеу-сауықтыру орталығы да бар. Жоба-сметалық құжаттамасын әзірлеуге облыстық бюджеттен 40 млн. теңге қаржы бөлінді. Алдын ала есеп бойынша құрылыс-монтаждау жұмыстарына 952,4 млн. теңге жұмсалады.

Сонымен қатар, кеңес мүшелері облыс орталығында салынатын 300 төсек- орынға арналған көпсалалы аурухана құрылысының эскиздік жобасын бірауыздан мақұлдады.

Сыр өңірінде медересе мәселесі шешілетін күн алыс емес. Кеңесте «Ақмешіт-Сырдария» орталық мешітінің аумағынан 50 орынға арналған білім жетілдіру медресесінің жобасы талқыланды. Екі бөліктен тұратын білім жетілдіру орталығының құрылысы жақын арада басталады.