Қызылордалық дәрігерлерге жаңа көліктер табысталды (ФОТО)
ҚЫЗЫЛОРДА. ҚазАқпарат - Жедел және кезек күттірмейтін дәрігерлік көмек көрсету сапасын арттыру мақсатында медициналық мекеме ұжымдарына облыс әкімі Қырымбек Көшербаев бүгін жаңа 50 санитарлық автокөліктің кілтін табыстады, деп хабарлады облыстық әкімдіктің баспасөз қызметінен.
- Денсаулық сақтау саласын дамытуда өңірімізде ауқымды шаралар атқарылып жатыр. Соңғы 2 жылда бұл саланы қаржыландыру 61,5 пайызға өсті. Халқымыздың орташа өмір сүру ұзақтығы 70,2 жасқа жетті, ана мен бала өлімі 30 пайызға азайды. Биылдың өзінде бірнеше медициналық жаңа нысандар іске қосылып, 200 орындық «Ана мен бала» орталығы, 13 дәрігерлік амбулатория, 2 аудандық емхана ел игілігіне берілді. Бұл медициналық мекемелерге осы жаңа автокөліктер толыққанды қызмет ететін болады, - деген облыс әкімі дәрігерлерге көліктердің кілтін тапсырды. Айта кетейік, қазіргі уақытта облысқа 75 автокөлік жеткізілді. Қараша айының соңына дейін санитарлық авиацияны жандандыру мақсатында аса қымбат медициналық құрылғылармен жабдықталған жол талғамайтын көлік және қалған 16 автокөлік әкелініп, өз жұмыстарын бастамақ. Сонымен, жылдың соңына дейін облыстық денсаулық сақтау саласы медициналық автокөлікпен 100 пайыз қамтылады.
