Лондон-2012: Қазақстандық зілтемірші А.Зайчиков Олимпиада жүлдесінен күдер үзді

АСТАНА. 6 тамыз. ҚазАқпарат -ХХХ жазғы ойындарда ауыр атлетика сайысының «Б» тобында өнер көрсеткен зілтеміршіміз Александр Зайчиков 6 орынға тұрақтады.

105 келіге дейінгі салмақ санатында жарыс жолына шыққан спортшымыз жұлқа көтеруде 155 келіні, ал серпе көтеруде 205 келіні бағындырды. Қорытынды есепте 360 келіні еңсерген спортшымыздың бұл көрсеткіші жүлделі орындарға табан тіреуге еш мүмкіндік бермеді.

Ал бұл топта латвиялық Артурс Плесниекс (175/215/390 кг) үздік нәтиже көрсетті. Екінші орында эквадорлық Дэвида Арройо Вальдеза болса (185/200/ 385 кг), үштікті германиялық Юрген Шписс (172/202/374 кг) қорытындылады.