ІІМ Қазақстандағы түрме режимі ең жиі бұзылатын мекемелерді атады
АСТАНА. KAZINFORM – Ішкі істер министрлігі Kazinform сауалына жолдаған жауапта елдегі түрме режимі ең жиі бұзылатын мекемелерді атап көрсетті.
- 2024 жылы түзету мекемелерінің режимін бұзудың 1 090 фактісі тіркелді. Сондай-ақ түрме режимін бұзудың ең көп фактісі Ақмола облысындағы №5 мекеме, Қостанай облысындағы №38 мекеме, Алматы облысының №12 мекемесінде тіркелді, - деп жазады министрліктегілер.
Ведомство мәліметіне сәйкес, кейінгі 5 жылда түзету мекемелерінде режим тәртібін бұзу жағдайларына тоқталсақ:
- 2022 жылы – 6 672
- 2023 жылы – 8 748
- 2024 жылы – 1 090
- 2025 жылы (1 қаңтардан бері) – 769 факті тіркелген.
Сондай-ақ, ведомство мамандары түрме режимін бұзудың ең жиі тіркелетін түрлері қандай екенін де айтты.
- Қылмыстық атқару жүйесінің барлық мекемелерінде үздіксіз бейнебақылау енгізілген. Атап айту керек, сотталғандар тарапынан негізінен күн тәртібі мен ұстау режимін бұзу тіркеледі, - деп жазылған жауапта.
Бұған дейін Қазақстан түрмелеріндегі 1 мыңнан астам әйел рақымшылыққа ілінуі мүмкін екенін жазған едік.
