Мәдени достық көпірі: Қазақстанның әскери музыканттары қатарлықтардың жүрегін жаулады

АСТАНА. KAZINFORM — Қатар БАҚ-тары қазақстандық музыканттардың Қатардың танымал патриоттық әнін орындауын мәдени гармонияның айқын көрінісі деп атады. Бұл туралы Kazinform агенттігінің меншікті тілшісі хабарлайды.

ҚР Қарулы күштерінің Ұлттық әскери-патриоттық орталығының Орталық әскери оркестрі Қатарда өткен I халықаралық әскери музыка және марштар фестиваліне қатысты.

Арнайы орындауда музыканттар Қатардың танымал композициясы Lel Ulla Ya Watani әнін шебер орындады.

— Дәстүрлі қазақ музыкалық аспаптарының сүйемелдеуімен оркестр фестивальге қатысу арқылы алғысын білдіріп, көрермендерді әсерлі орындауларымен тәнті етті, — деп жазды Қатар БАҚ-тары.

Жергілікті ақпарат көздері хабарлағандай, қазақстандық бағдарлама музыкалық әртүрлілігімен, сондай-ақ әскери шеру мен дәл ұйымдастырылған құрылымдарымен есте қалды. Бұл орындаушылардың тәртібі мен кәсіби шеберлігін көрсетті.

— Дәстүрлі және заманауи элементтерді біріктіре отырып, бұл орындау әскери музыканың мәдени және көркемдік рөлін халықтар арасындағы диалогты, өзара түсіністікті және байланыстарды нығайтудағы маңыздылығын көрсетеді, — деп атап өтті Қатар ақпарат көздері.

Бұдан бұрын Қатарда қазақстандық мұнайшыларға сұраныс артуы мүмкін екенін жазған едік.

Сонымен қатар Қатарда Қазақстан азаматтарына жұмысқа орналасу жеңілдейтіні анықталды.