Макрон: ХАМАС-ты жазалау керек, бірақ бейбіт тұрғындар кінәлі емес
Франция Президенті Эмманюэль Макрон Қазақстанға ресми сапары аясында Maqsut Narikbayev University студенттеріне дәріс оқып, сауалдарына жауап беріп жатыр. Таяу Шығыс және Израиль мен Палестина қақтығысы туралы да пікір білдірді, деп хабарлайды Kazinform.
Айтуынша, Францияда Израильді де, Палестинаны да қолдайтындар бар.
«Менің көшбасы ретінде позициям қандай? Бұл жай ғана бір жерде оқи салатын мәселе емес. Біз Израильге жасалған террористік шабуылдардың барлығы дұрыс емес деп есептейміз. Біз осы мемлекетті қолдаймыз. Ешкім өз мемлекетінде біреудің өлтірілгенін, мыңдаған адамның өмірі қиылғанын қаламас еді. Бұл террорлық шабуылдарды айыптауымыз керек», - деп атап өтті Франция басшысы.
Екіншіден Макрон халықаралық құқықты сақтау керектігін айтты.
«Террорлық ХАМАС-ты жазалау керек, бірақ сол жерде өмір сүретін бейбіт тұрғындар кінәлі емес, оларды қорғау керек. Сол себепті, Газадағы тұрғындарды қорғау үшін, құтқару үшін гуманитарлық көмек жіберуді сұрадық, ешқандай террорлық шабуылға қатысы жоқ адамдарды қорғау керек деп есептейміз.
Менің көңілім толмайтын нәрсе – адамдардың өмірін алалайтындар бар. Палестиналықтардың өмірі немесе израильдіктердің өмірі маңыздырақ деген ақылға қонбайтын пікірталас бар. Менің ойымша, бұл жерде жалпы адамның өмірі туралы, адамның құндылықтары ерекше деген түсініктер айтылуы керек. Бұл БҰҰ-да негізделген. Сонымен біздің ойымыз – біріншіден, терроризммен күресу, екіншіден – халықты қорғау, үшінші – саяси диалог құру керек», - деді Эмманюэль Макрон.
Еске салайық, Франция Президенті Эмманюэль Макрон ресми сапармен Қазақстанға келді. Қасым-Жомарт Тоқаев Ақордада Франция Президенті Эмманюэль Макронды қарсы алды.
Қазақстан мен Франция президенттері шағын құрамда келіссөз жүргізді. Макрон бұл сапар екіжақты серіктестік үшін маңызды жылмен тұспа-тұс келіп отырғанын айтты. Қазақстан Президенті өз сөзінде Франция – Қазақстанның Еуропадағы өте маңызды серіктесі екенін атап өтті. Сондай-ақ, Президент кездесу кезінде білім және ғылым саласындағы жобаларды қолға алуға ерекше көңіл бөлінгенін жеткізді. Эмманюэль Макрон қазақ мектептеріне француз тілін оқыту тәжірибесі қайта оралғаны маңызды екенін жеткізді. Мемлекет басшысы Қасым-Жомарт Тоқаев әлемдегі түрлі саяси шиеленістер мен экономикалық дағдарыстар елді алаңдатып отырғанына тоқталды. Франция Президенті мемлекеттер арасындағы қарым-қатынастың франциялық үлгісі туралы айтты. Қасым-Жомарт Тоқаев пен Эмманюэль Макрон екі мемлекеттің ресми делегацияларының қатысуымен кеңейтілген құрамда келіссөз жүргізді. Франция президенті Эмманюэль Макрон Мемлекет басшысы Қасым-Жомарт Тоқаевпен Ақордадағы кездесуі кезінде Қарағанды облысында қаза болған шахтерлердің отбасына көңіл айтты.
Мемлекет басшыларының кездесуінен кейінгі қос елдің қарым-қатынасы қай бағытта дамуы мүмкін?
