Маңғыстаудың ауылында 25 жылдан бері асфальт төселмеген көше бар
АҚТАУ. KAZINFORM — Маңғыстауда Ақшұқыр ауылында Балсұлу Сахиева көшесінің алақандай жеріне 25 жылдан бері асфальт төселмей келеді. Тұрғындардың айтуынша, жолдың жоқтығынан үйлеріне жедел-жәрдем мен такси келмейді.
— Көшемізге асфальт керек. Сосын жарық керек. Жол жоқ болғасын такси келмейді. Жедел-жәрдем де жолдарың нашар дейді. Жаңбыр жауса, балшық болады. Бүкіл Ақшұқырда біздің көшеден басқасының бәрі асфальтталған, — дейді Ақшұқыр ауылының тұрғыны Мырзағали Сонабаев.
Аталған көшенің ұзындығы 2 шақырымды құрайды. Соның 400 метр жеріне асфальт төселмеген. Тұрғындар соған жол салып беруді сұрайды.
— Жол жоқ, оның үстіне жарық та жоқ. Қараңғы түскенде сабақтан қайтқан балаларға өте қиын. Айналада қаңғыбас ит көп. Өзім сүрініп, талай құлағанмын осы жолда, — дейді Ақшұқыр ауылының тұрғыны Бөпіш Қадірова.
Ақшұқыр ауылының әкімі Еркебұлан Жәнібектің айтуынша, асфальт төсеуге жол бойында тұрған электр бағаналары мен ауыз су құбырлары жүргізілген құдықтар кедергі болып тұр. Сондықтан әзірше құм төгіп, жолды тегістеуден басқа амал жоқ.
— Балсұлу Сахиеваға үш көше жатады. Соның 2-еуі асфальтталды. Енді мына көшеде қайта құрылымдайтын жұмыстар бар. Сол үшін біздер жобалық сметалық құжаттамаға ұсынып қойдық. Жобалық сметалық құжаттамасы дайын болғанда асфальттаймыз, — дейді ауыл әкімі.
Айта кетейік, Ақтауда президенттің бұрынғы резиденциясының орнына мешіт пен стадион салынатыны анықталды.
