Маңғыстаулық паралимпиадашылар көшеде және жер үйдің ауласында жаттығуға мәжбүр
АҚТАУ. KAZINFORM — Жаңаөзен қаласында паралимпиада спортшылары атпен көшеде жаттығуға мәжбүр. Себебі ат спортына жабдықталған арнайы орын жоқ.
Жаңаөзен қаласының тұрғыны Самат Әлен мүмкіндігі шектеулі балаларды 2018 жылдан бері ат спортына баулып келеді. Нәтижесінде 20 шақты спортшы шыққан.
Олар жыл сайын шетелде өтетін жарыста жүлделі орындарды иеленіп жүр.
Кеше ғана Қазақстан чемпионатынан 1 алтын, 1 күміс медаль алған. Ал, Қазақстан кубогында 5 алтын 4 күміс медаль еншілеп, Маңғыстаудың абыройын асқақтатқан.
— Осы кезге дейін 20 шақты паралимпиада спортшысын тәрбиелеп шығардық. Енді оның ішінде ауырып қалғандары да бар. Себебі жабық манеждің жоқтығынан суық күндері далада жаттығуға тура келеді. Балалардың денсаулығы онсыз да нашар. Көп спортшымыз шығып кетіп жатыр. Халықаралық жарыстар көбіне қыс мезгілінде болады. Сондықтан біздің спортшылар қақаған қыста ашық аспан астында дайындалады, — дейді Самат Әлен.
Жаттықтырушы жабық манеждің тек Маңғыстауда ғана жоқ екенін айтады. Паралимпиада спортшылары қазір Жаңаөзен қаласының тұрғыны, қайырымды жан Марат Ідірістің жылқыларымен соның ауласында жаттығып жүр.
Әкімдік Жаңаөзен қаласынан 20 шақырым жердегі ипподромның ашық алаңын ұсынған. Алайда оған мүмкіндігі шектеулі спортшылар қатынай алмаймыз дейді. Паралимпиадашыларға қаланың маңынан жабық орын қажет.
Мәселеге Жаңаөзен қаласының әкімі Жансейіт Қайнарбай пікір білдірді. Шенеуніктің айтуынша, қаланың ішінен жабық манеж салу санитарлық талапқа сай келмейді. Сондықтан елдімекендердің шет жағынан жер беру мәселесі қаралмақ.
— Ұлттық спортты қолдауға өзіміз де дайынбыз, дегенмен мұның барлығы қаржы мәселесіне келіп тіреліп тұр. Осы маңнан уақытша жер беру бойынша өткенде ұсыныс берген. Енді оны алдағы уақытта заңға сәйкес міндетті түрде қараймыз, — дейді қала әкімі Жансейіт Қайнарбай.
Бұған дейін Ақтауда 36 гектарға жуық жер мәжбүрлі түрде мемлекетке қайтарылғанын жазған болатынбыз.
