«Мәтібұлақ» полигонында «Бейбіт мақсат-2010» лаңкестікке қарсы бірлескен әскери жаттығу басталды

АЛМАТЫ. Қыркүйектің 13-і. ҚазАқпарат /Данияр Сиқымбаев/ - Жамбыл облысындағы «Мәтібұлақ» полигонында бүгін «Бейбіт мақсат-2010» лаңкестікке қарсы бірлескен әскери жаттығудың ашылу рәсімі өтті. Салтанатты рәсімді өткізу үшін дала лагерінің плацына Шанхай ынтымақтастығы ұйымына қатысушы барлық елдердің қарулы күштерінің әскери контингенті - 3 мыңнан астам әскери қызметкер жиналды.

Жаттығуға қатысушылардың барлық эшалондары мен колонналары және техникалары қазіргі таңда Қазақстанға келіп жетті. Жиналған қауымның алдында сөз сөйлеген ҚР Құрғақтағы әскерінің бас қолбасшысы генерал-майор Мұрат Майкеев, өткізіліп отырған жаттығудың Шанхай ынтымақтастығы ұйымына қатысушы әрбір мемлекеттің және жалпы Ұйымның тарихындағы маңызды оқиға екенін атап көрсетті. «Біз бір-бірімізбен иықтасып жаттығу өткізгелі отырмыз. Ортақ тіл табатынымызға, барлық мәселені шешіп, нәтижесінде бірлескен жаттығуды үйлесімді және нақты өткізетіндігімізге сенімдімін», деді генерал-майор М.Майкеев өз сөзінде. Одан кейін Қазақстан, Қытай, Ресей, Тәжікстан және Ресей елдерінің әнұрандары орындалып, флагштоктарда ШЫҰ елдерінің жалаулары көтерілді.

Жаттығу қыркүйектің 9-ы мен 25-і аралығында жалғасады.