Майқайыңда опат болған құтқарушының отбасы жұмыс берушіден 120 млн теңге өндіріп алды

ПАВЛОДАР. KAZINFORM — Павлодар облысы Майқайыңалтын кен орнында алып шұңқырға құлаған автобус оқиғасы бойынша сот үкімі шықты. 

Биыл 4 қаңтарда «Майқайыңалтын» АҚ аумағындағы болжамды өрт орнына технологиялық жолмен келе жатқанда үш құтқарушы мен жүргізушісі бар автобус шұңқырға құлап кеткен.

Қаза тапқандар — «Кәсіби әскерилендірілген авариялық-құтқару қызметтерінің республикалық орталық штабы» ЖШС қызметкерлері.

Осы факті бойынша құрамында Төтенше жағдайлар министрлігі, Павлодар облысының әкімдігі, мемлекеттік еңбек инспекторы, «Майқайыңалтын» АҚ, «Кәсіби әскерилендірілген авариялық-құтқару қызметтерінің республикалық орталық штабы» ЖШС-нен құралған комиссия жазатайым оқиғаға тексеру жүргізіп, оның қорытындысы бойынша жұмыс берушінің кінәсі — 100%, жұмыскерлердің кінәсі мүлде жоқ екені анықталды.

Қайтыс болған құтқарушы Т-ның анасы, қызы, ұлы және әпкесі марқұмның қызметтік міндеттерін атқару кезінде қайтыс болуына байланысты моральдық залал өтеуді талап етіп сотқа жүгінді.

Моральдық зиян олардың ұлынан, әкесінен, ағасынан айырылуының ауырлығынан, жерлеу кезінде онымен қоштасуға мүмкіндік болмауынан, жұмыс берушінің көңіл айтып, қолдау көрсетпеуінен болып отыр.

Сот болған жазатайым оқиғаға жұмыс берушінің 100% кінәсін негізге ала отырып, қайтыс болған құтқарушының туыстарының талаптарын толық көлемде қанағаттандырып, әрбір туысының пайдасына қойылған талап көлемінде 30 000 000 теңгеден, жалпы сомасы 120 млн теңге моральдық зиян өндірді.

Шешім заңды күшіне енген жоқ.

Еске сала кетейік, 4 қаңтарда Павлодар облысындағы Майқайың алтын кенішінде ішінде адамдар бар автобус жер астына түсіп кетті.

Апат болған күні оқиға орнынан екі құтқарушының мүрдесі табылды.

Кейін құтқарушылар топырақтың жиі қозғалуына байланысты жер қазу жұмыстарын тоқтатты.

Ал мамыр айында Майқайың алтын кенішінде қос құтқарушыны іздеу жұмыстары қайта жанданды.

19 шілдеде Майқайыңда алты айдан соң үшінші құтқарушының мүрдесі табылған еді. Марқұм Айдос Шаймерденнің денесі 70 метр тереңдіктен қазып алынған.

25 шілде күні Майқайыңдағы ойыққа түсіп кеткен автобус табылып, жердің астына түсіп кеткен соңғы адамның денесі жоғарыға шығарылды.

Астана соты алтын кенішіндегі қайғылы оқиға 100% «Майқайың-алтын» АҚ-ның кінәсінен болған деген шешім шығарды.