Мемлекетаралық араздыққа шақыратын шетелдіктердің Өзбекстанға кіруіне тыйым салынады

ТАШКЕНТ. KAZINFORM — Өзбекстан президенті Шавкат Мирзиёев түзету енгізілген «Өзбекстандағы шетел азаматтары мен азаматтығы жоқ адамдардың құқықтық жағдайы туралы» заңына қол қойды, деп хабарлайды Kazinform агенттігінің меншікті тілшісі.

Құжатқа сай, ұлтаралық, әлеуметтік және мемлекетаралық араздыққа шақыратын шетелдіктер енді елге кіруге немесе тұруға құқылы емес деп танылады. Ондай азаматтар Заң шығару палатасының кенгаштарты, Сенат пен арнайы уәкілетті органдардың ұсынысы негізінде арнайы тізімге енгізіледі.

Осы ретте ел үкіметіне 1 айдың ішінде шетелдіктерді аталған тізімге енгізу тәртібін бекіту тапсырылды. Реестрді Өзбекстанның Сыртқы істер министрлігі жүргізеді.

Тізімге енген азаматтарға Өзбекстанға кіруге, банк шотын ашуға, жылжымайтын мүлік сатып алуға, мемлекеттік мүлікті жекешелендіруге және түрлі салада келісімдер жасауына тыйым салынады.

Олар тиісті реестрде 5 жыл тұрады. Егер осы уақыт ішінде азамат өзінің теріс көзқарасынан айнымаса, ол тізімде 5 жылдан кейін де қала береді.

Өзбекстанда тұрақты немесе уақытша тұратын шетелдік пен азаматтығы жоқ адам тізімге енгені туралы хабарлама алғаннан кейін 10 күн ішінде өз еркімен елден кетуі тиіс.

Талапты елемеген жағдайда ол азамат ішкі істер органдары және өзге де уәкілетті ведомстволардың араласуымен депортацияланады. Ол уақытта шетелдікке берілген виза да күшін жояды.

Бұған дейін келер жылы Өзбекстан үкіметі халықты әлеуметтік қорғауға 39 млн доллар бағыттайтыны хабарланды.