«Мен саған сенемін» - Димаш Украинада сынға түскен Данэлияға қолдау білдірді

АСТАНА. ҚазАқпарат - Қазақстанның атын әлемге танытқан әнші Димаш Құдайберген Украинада балалардың арасында өтіп жатқан ән сайысында төрешілерді таң қалдырған Данэлия Төлешоваға қолдау білдірді, деп хабарлайды «ҚазАқпарат» ХАА тілшісі.

«Бәрекелді ханшайым! Сен әнді керемет орындадың. Сен ақтық сайысқа дейін жетерсің деген үміттемін. Мен саған сенемін», - деп жазды Данэлия Төлешованың Инстаграм парақшасының астына пікір қалдырған Димаш Құдайберген.

Димаштың жас өренге сәт-сапар тілеп жатқанына әншінің жанкүйерлері де (dimashdearstar) ілтипатын білдіруде.

«Димаш, бізді таңғалдыруды қашан қоясың? Сен Қытайдасың, жеке концертіңе дайындалып, альбом жазып жатырсың. Сонда да елдегі жаңалықты бізден жақсы біліп отырсың. Конкурсқа қатысудың ауыр екенін сенен артық ешкім түсінбейтін шығар. Сондықтан оған қолдау көрсетіп жатырсың. Сенен үлгі алып өссін Данэлия», - деп жазады Димаштың жанкүйерлері.

Айта кетейік, алматылық Данэлия Төлешова Украинада  Дэми Ловатоның «Stone Cold» әнін орындап, төрешілер мен көрермендерді таңғалдырған болатын. Украина төрешілері алматылық оқушыны «құбылыс» деп танып, оған «әлемнің болашақ жұлдызы» деп баға берген еді.