Министрлік пен өңірлер қоқыс өңдеуді созбалаңға салып жіберді – Премьер-Министр

АСТАНА. KAZINFORM – ҚР Премьер-Министрі Олжас Бектенов елімізде қалдықтарды басқару инфрақұрылымын дамыту мәселесі сол күйі толық шешімін таппағанын сынға алды.

«Халықаралық тәжірибе көрсетіп отырғандай, дамыған елдер тұрмыстық қалдықтарды қайтадан өңдеп, барынша кәдеге жаратуда. Ал бізде қарапайым сөзбен айтқанда, жиналған қоқысты жерге көме салу, тіпті таудай қылып үйіп қою үйреншікті жағдайға айналды. Бұл елді мекендердің көркін бұзумен қатар, ешқандай санитариялық, экологиялық нормаларға сай келмейді», - деді О. Бектенов Үкімет отырысында. 

Сонымен бірге, Үкімет басшысы тамақ қалдықтарын кәдеге жарату мен қайта өңдеу мәселелері де қауіпті екенін атап өтті. 

«Аталған проблемаларды шешу үшін қалдық жинаудан бастап, қайта өңдеуге дейін кәдеге жаратудың тиісті механизмдерін әзірлеу қажет. Министрлік пен өңірлер бұл жұмысты созбалаңға салып жіберді. Кәсіпорындардың көпшілігі қайталама шикізатты жинаумен, оны буып-түйіп, шетелге сатумен ғана айналысады. Ал қалдықтарды қайта өңдеп, түпкілікті өнім шығарып отырғандар аз», - деді Олжас Бектенов. 

Мысалы Солтүстік Қазақстан облысында «Радуга» компаниясы полиэтилен мен қағаз қалдықтарын қайта өңдеп, халық тұтынатын әр түрлі тауарлар өндіреді. Шымкентте «Еврокристалл» компаниясы шыныны қайта өңдеп, ыдыс-аяқ шығарады. 

Алматы облысында «KZ recycling» компаниясы макулатурадан қағаз өнімдерін шығарады.Ал Қызылорда облысында әрбір аудан қалдықтарды қайта өңдеуге қатысты өз жобаларын іске асыруда. 

«Осындай оң тәжірибелер әр өңірде болуға тиіс. Алайда Атырау, Ақтөбе және Абай облыстарында көптен бері қалдықтарды сұрыптау желісін іске қоса алмай келеді. Бүкіл әлемде қоқысты қайта өңдеу табысты бизнес болып саналады. Біз де бұл бағытта замана көшінен қалмауға тиіспіз», - деді Премьер-Министр.