Минскіде Қазақстан-Беларусь байланыстарын тереңдетудің жолдары айқындалды
МИНСК. 14 мамыр. ҚазАқпарат - Бүгін Минскіде ҚР Президенті Нұрсұлтан Назарбаевтың Беларусь Республикасына жасаған ресми сапарының қорытындысы бойынша өткен баспасөз мәслихатында, Елбасы өткен келіссөздерге баға берді.
«Мен бүгін өткен келіссөздерді жоғары бағалаймын. Біздің бүгінгі кездесуіміздің басты нәтижесі - екіжақты байланыстарымызды және көпжақты форматта өзара әрекет етуді одан әрі тереңдету жолдарын айқындау. Олар біз Александр Григорьевич Лукашенкомен қабылдаған бірлескен мәлімдемеде көрініс тапты», - деп атап көрсетті ол.
Сонымен қатар Н. Назарбаев осы жылдың қыркүйек айында Қазақстан мен Беларусь арасында дипломатиялық қарым-қатынастардың орнатылғанына 20 жыл толатындығын атап өтті.
