Мьянмадағы жер сілкінісінен қаза тапқандар саны 1600-ден асты

АСТАНА. KAZINFORM – Мьянма билігі 28 наурыз, жұма күні болған 7,7 және 6,4 магнитудалы жойқын жер сілкіністерінің салдарынан 1644 адамның қаза тауып, 3408 адамның зардап шекті, деп хабарлайды BBC.

Кемінде 1644 адам қаза тауып, 3408 адам жарақат алды, тағы 139 адам хабар-ошарсыз кеткендер тізімінде.

Таиланд билігінің мәліметінше, Бангкок муниципалитеті жергілікті уақытпен 18:30–да (Гринвич бойынша 11:30) 10 адамның қаза болғанын, 42 адамның жарақат алғанын және 78 адамның із-түзсіз жоғалғанын хабарлады.

Құтқарушылар үйінділерді аршуды жалғастырған сайын құрбандар санының артуы мүмкін.

Мьянмадағы екінші ірі қала — Мандалайдағы құтқару қызметінің өкілі BBC-ге «зиян өте үлкен» екенін айтты. Құтқару жұмыстары түнде де жалғасқан, алайда афтершоктар жағдайды қиындатқан.

АҚШ Геологиялық қызметінің (USGS) мәліметінше, Мьянмада 28 наурыз, жұма күні 7,7 және 6,4 магнитудалы жер сілкіністері болды.

USGS мәліметінше, алғашқы, күштірек жер сілкінісі жұма күні жергілікті уақытпен 12:50–де, 10 шақырым тереңдікте, Мьянманың орталық бөлігінде тіркелген. Ал екіншісі одан 12 минут өткен соң болған.

Жер сілкінісінің эпицентрі Мандалай қаласынан (елдегі екінші ірі қала, халқы — 1,2 млн адам) солтүстік-батысқа қарай 16 км қашықтықтағы Сагайн елді мекенінің маңында орналасқан.

Бұл аймақ Мьянма астанасы Нейпьидодан шамамен 100 км солтүстікте жатыр.

Жерасты дүмпулері Таиланд пен Қытайда да сезілді.

Айта кетейік, жұма күні Мьянмада магнитудасы 7,9 болатын тағы бір жер сілкінісі тіркелген.

Таиландта жер сілкінісіне байланысты эвакуация жұмыстары жүргізілді, Бангкокта көпқабатты ғимарат құлады. Елдің премьер-министрі Бангкокты «төтенше жағдай аймағы» деп жариялады.