НАТО Бас хатшысы АҚШ-тың Альянсқа қатысты ұстанымы туралы баяндады
АСТАНА. KAZINFORM – Бүгін Брюссельде НАТО Сыртқы істер министрлерінің саммиті басталды. Баспасөз мәслихаты барысында Альянстың бас хатшысы Марк Рютте белгілегендей, АҚШ-тың әлемдегі ірі әскери блоктардың біріне қатысу форматын өзгертуге ниетті емес, деп хабарлайды Kazinform меншікті тілшісі.
Ол президент Дональд Трамп басшылығы кезінде Американың Еуропадан шығуына қатысты алаңдаушылықтың артуына жауап ретінде Құрама Штаттардың Альянсқа бейілділігі сияқты НАТО да берік екенін мәлімдеді.
— Америкалықтар НАТО-ға, 5-бапқа бейілділігін қайта-қайта мәлімдеді… Мен бұл альянстің АҚШ-пен ұзақ уақыт бойы қалатынына толық сенімдімін, — деді ол Брюссельде тілшілерге.
Марк Рютте қосып өткендей, міндеттеме «Атлант мұхитының осы жағында және Канадада қорғанысқа көбірек жұмсайды деп күтетін» нақты үмітпен қатар келіп отыр.
Жергілікті БАҚ-тың жазуынша, НАТО-ның мақсаты — қорғанысқа ішкі жалпы өнімнің кем дегенде 2 пайызын жұмсау, бірақ Дональд Трамп бұл көрсеткішті 5 пайызға дейін жеткізгісі келеді. Марк Рютте «3 пайыздан айтарлықтай көп» туралы айтты.
Бұл мәселе альянстың сыртқы істер министрлерінің бейсенбі және жұма күндері Брюссельде өтетін отырысында көтерілетіні атап өтілді.
Washington Post газеті АҚШ әскері мен қару-жарағын Еуропадан Үнді-Тынық мұхиты аймағына көшіруді бастау жоспары туралы хабарлады, ал NBC News АҚШ әкімшілігі Еуропадағы одақтас күштердің жоғарғы қолбасшысы лауазымын еуропалық адамға тапсыруы мүмкін екенін жазды.
Марк Рютте АҚШ әскерін Азияға жіберу мүмкіндігіне қатысты жоғарыда аталған жарияланымдар бойынша сұрақтарға жауап берген жоқ.
— Мен қауесеттен басқа ештеңе көрмедім. Бұл мәселе бойынша АҚШ-тың нақты ұсыныстарын көрген жоқпын. Әскерді шығару немесе оған ұқсас еш жоспар жоқ. Біз АҚШ-тың НАТО-ға толығымен адал екенін білеміз, — деді ол.
Бұған дейін Брюссельде НАТО-ның 75 жылдық мерейтойы салтанатты түрде атап өтілетінін жазған болатынбыз.
Альянстың құрылуы мен кеңею тарихы туралы осы сілтеме арқылы оқи аласыз.
