НАТО-ның тұтастығы үшін алаңдауға негіз жоқ — Еркін Тұқымов
АСТАНА. KAZINFORM — Солтүстік Атлантикалық альянс қызметін жалғастырады, тіпті жаңа мүшелердің қосылуымен одан әрі күшейе түседі. Бұл туралы Қазақстанның стратегиялық зерттеулер институтының директоры Еркін Тұқымов Jibek Joly телеарнасының «Уәде» бағдарламасында мәлім етті.
Сарапшының пікірінше, альянстың құрылымы сақталып қана қоймай, дамып келеді.
— Менің ойымша, НАТО-ның тұтастығы үшін алаңдаудың қажеті жоқ, бұл өте мықты құрылым. Ол өз жұмысын жалғастырады. Тіпті, жаңа мүшелердің қосылуына байланысты күшеюі де мүмкін. Мысал ретінде Швеция мен Финляндияны айтуға болады. Жалпы, АҚШ-тың риторикасына мұқият назар аударсақ, олар Солтүстік Атлантикалық альянстың тарауы туралы емес, керісінше, еуропалық қатысушылардың жауапкершілігін арттыру туралы айтып отыр, — деді Еркін Тұқымов сұхбат барысында.
Оның айтуынша, біраз мемлекет НАТО елдерінің қорғанысқа арналған шығындар бойынша өз міндеттемесін ұзақ уақыт бойы орындап келеді.
— Көп жылдар бойы НАТО-ның біраз мүшесі міндеттемелерін орындаған жоқ, олар ЖІӨ-нің кемінде 2%-ын қару-жарақ пен қорғанысқа жұмсауы керек болатын. Әлі күнге дейін 8-9 мемлекет бұл талапты орындамай келеді. Әрине, бұл жайт америкалықтарды алаңдатады, себебі олардың үлесі еуропалық серіктестерінің үлесімен салыстырғанда тым жоғары. Сондықтан олар қорғанысқа, қауіпсіздікке көбірек қаражат бөлуді талап етеді, — деп түсіндірді ҚСЗИ директоры.
Қазақстанға келер болсақ, Еркін Тұқымовтың пікірінше, еуропалық қауіпсіздік мәселелеріне қатысты талқылауларда асыра сілтеудің қажеті жоқ.
— Бұл — еуропалық қауіпсіздік мәселелері, олар мәселені өздері шешеді. Бұл бағытта олардың нақты ұстанымы бар. Кеше ғана Германиядағы сайлау нәтижелері жарияланды, онда Фридрих Мерц жеңіске жетті, оның Еуропаның мықты қарулы күшін құру ойы бар, — деп түйіндеді Е. Тұқымов.
Айта кетсек, жыл басында Мемлекеттік кеңесші Ерлан Қарин Президент жанындағы Қазақстанның стратегиялық зерттеулер институты (ҚСЗИ) Ғылыми кеңесінің кеңейтілген отырысына қатысты.
