Облыстық ақпараттық-насихаттық топ мүшелері Қызылорда қаласына қарасты ауылдарды аралады
деп хабарлайды ҚазАқпарат тілшісі.
Олар көпшілікке Елбасының биылғы Жолдауынан туындайтын маңызды міндеттерді жан-жақты жеткізіп, халықпен ашық пікірлесті. Тасбөгет кентіндегі С.Майқанова атындағы мәдениет үйінде облыстық мәслихат депутаты Елеусін Дүйсенов бастаған топ тұрғындармен келелі әңгіме өткізді. Олар ел-жұртқа Елбасы Жолдауының халықтық маңызын аша айтты. №257 мектеп директоры, қалалық мәслихат депутаты Нәзира Жаппарова алдағы кезеңдерде атқарылатын ізгі жұмыстарды көрсетіп берген Жолдауға өз саласы бойынша тоқталды. Тұрғындар жер учаскесінің, жол мәселесінің төңірегіндегі ойларын ортаға салды.
Осындай кездесудің бірі облыс орталығындағы №3 мектеп-гимназияда болды. Осы жиында Қорқыт ата атындағы Қызылорда мемлекеттік университетінің оқытушысы Айтжан Оразбақов ғылым мен білімге баса көңіл бөлген Елбасы бағытының орындалуына әр кісінің үлес қосу тиіс екенін келтірді. Сондай-ақ топ мүшесі, өзбек ұлттық-мәдени орталығының жетекшісі Ашур Хамидов бірлік пен достық, еңбеккерлік хақында сөз қозғады.