Өкілдер палатасы АҚШ федералдық агенттіктерін қаржыландыру туралы заң жобасын мақұлдады

АСТАНА. KAZINFORM – Федералдық агенттіктерді қыркүйекке дейін қаржыландыруға мүмкіндік беретін жаңа заң жобасы мақұлдану үшін Сенатқа жолданды, деп хабарлайды PBS.

Өкілдер палатасындағы дауыс беру кезінде қаржыландыру туралы заң жобасын 217 адам қолдаса, 213-і оған қарсы болды.

Сенатта республикашыларға заң жобасы президент Дональд Трамптың үстеліне жету үшін кемі 8 демократтың қолдауы қажет болады. 

Заң шығарушылардың мәлімдеуінше, заң жобасы қорғанысқа байланысты емес шығындарды 2024 жылғы бюджетпен салыстырғанда 13 млрд долларға қысқартады және қорғаныс шығындарын 6 млрд долларға арттырады, бұл екі санат үшін шығындардың шамамен 1,7 трлн доллар жалпы көрсеткішімен салыстырғанда шамалы өзгеріс болып отыр. 

Демократтарды көбіне заң жобасындағы Трамп әкімшілігіне шығындар туралы шешімдер шығаруда билік және басымдықтарды қайта тұжырымдау еркіндігін беруі алаңдатып отыр. 

Өз кезегінде демократтар 11 сәуірге дейін үкіметті қаржыландыруды қарастыратын балама заң жобасын ұсынды. Республикашылардың қолдауы сәтсіз болған жағдайда заң жобасы «Б» жоспары ретінде қызмет етуі мүмкін.

Бұған дейін Трамп Конгресті үкіметті уақытша қаржыландыру туралы заң жобасын қолдауға шақырғанын жазған болатынбыз.