ОҚО-да саяхатшы Біркөлік тау шатқалында жоғалып кетті
ШЫМКЕНТ. ҚазАқпарат - Оңтүстік Қазақстан облысында саяхатшы жоғалып кетті. 30 жастағы Қасымбек Құдасов Біркөлік тау шатқалының «Галкина» асуына шығып, қайтып оралмаған, деп хабарлайды ҚазАқпарат ХАА тілшісі.
Өңірдің төтенше жағдайлар қызметіне саяхатшының жоғалып кеткені туралы келесі күні хабар түседі. Оқиға орнына жедел-іздестіру жасағының 5 адамы 1 техникамен жетіп, жанында болған кісілерден жоғалған азамат туралы сұрастырған. Белгілі болғандай, Шардара ауданының тұрғыны жерлестерімен бірге саяхаттап келген екен. 15-ші шілде күні «Галкина» асуына бет алған саяхатшы сол күйі хабарсыз кетіпті.
Осыдан кейін құтқарушылар Біркөлік тау шатқалының асуларын іздестірген. Олардың қатарына Төле би ауданынының 2 құтқарушысы мен жоғалған саяхатшының 12 танысы қосылған.
Алайда бұл топтың түске дейінгі іздестіру шаралары нәтиже бермейді. Болмаған соң із кесушілерге тағы 7 адам мен 2 техника жолданған. Құтқарушылар тек кешкі 17.45-те ғана жоғалған азаматты таба алған. Ол лагері базасынан 3 шақырымдай жерге кетіп қалыпты. Оның сол аяғы сынып ешқайда қозғала алмай қалғаны белгілі болды. Жарақат алған саяхатшыға алғашқы медициналық жәрдем көрсетіліп, ауруханаға жеткізілді.
