Олимпиада жүлдегері Назым Қызайбай референдумда дауыс берді
АЛМАТЫ. KAZINFORM – Бокстан Париж Олимпиадасының қола жүлдегері Назым Қызайбай Қазақстанда атом электр стансасын салу жөніндегі референдумда дауыс берді.
Танымал қазақстандық боксшы таңдауын Алматыдағы №186 орта мектепте орналасқан № 515 референдум учаскесінде жасады.
Ол бүгін бүкіл ел үшін маңызды күн екенін, сондықтан дауыс беруге қатысу туралы шешім қабылдағанын жеткізді.
Айта кетейік, Алматыда жалпы халықтық референдумда дауыс беру 624 учаскеде жүріп жатыр. Оның 549-ы азаматтарды тұрақты тіркеу орындары бойынша болса, ал 75-і – ауруханалар, санаторийлер және әскери бөлімдер сияқты уақытша орналасқан орындар.
Сондай-ақ 172 учаскеде тіркеуді тексеру сервистері орнатылады. Олар дауыс берушілер өзін тізімінен таппаған жағдайда қолданылады.
Мегаполисте 1,2 млн астам адам дауыс беруге құқылы.
Осыған дейін Алматы әкімі Ерболат Досаевтың жұбайымен бірге дауыс беру орнына келгені туралы жазған едік.
Еске салайық, бүгін қазақстандықтар атом электр станциясын салу мәселесі бойынша жалпыұлттық референдумда дауыс береді.
