Оңтүстік өңірлерге электр энергиясын беру толық қалпына келтірілді - KEGOC
НҰР-СҰЛТАН. ҚазАқпарат – Қазақстанның бірыңғай энергия жүйесінің оңтүстік аймағын электрмен жабдықтау толығымен қалпына келтірілді. Бұл жайында «KEGOC» компаниясынан мәлім етті, деп хабарлайды ҚазАқпарат тілшісі.
«Қазіргі уақытта ұлттық электр желісінің қалыпты сызбасы толығымен қалпына келтірілді. Қырғызстан және Өзбекстанның энергия жүйесімен параллельді жұмыс жолға қойылды. Сағат 15:50-де (Нұр-Сұлтан уақытымен) Алматы қаласы, Алматы, Түркістан, Қызылорда және Жамбыл облыстары тұрғындарын электрмен жабдықтауға шектеулер толығымен алынды. «Қазфосат» және «ТМЗ» ЖШС-леріне ғана электр берілген жоқ», - деп атап өтеді компаниядан.
«KEGOC» мәліметінше, сағат 20:41-де Жамбыл облысын қоса алғанда оңтүстік аймақтағы барлық шектеулер алынды. Қазақстанның бірыңғай энергия жүйесі қалыпты режимде жұмыс істеп тұр.
Естеріңізге сала кетсек, 2022 жылдың 25 қаңтарында сағат 11.59-да (Нұр-Сұлтан уақытымен) Орталық Азия (Өзбекстан, Қырғызстан) энергия жүйесінде туындаған ақау салдарынан «Солтүстік-Шығыс-Қазақстанның оңтүстігі» 500 кВ электр энергиясы транзитіне арналған қуаттың төмендеуі орын алды.
Соның салдарынан Алматының бірнеше ауданында электр энергиясы өшіп қалды. Сондай-ақ Қызылорда облысында электр энергиясына байланысты іркіліс болды.
Бұдан бөлек, әлеуметтік желілерде жарық Жамбыл және Түркістан облыстарында да өшкені туралы жазылды.
Электр энергиясы Қазақстанмен қатар, Өзбекстанда және Қырғызстан елдерінде де өшті.