Оңтүстік Кореяға келген туристер саны биыл 20 миллионнан асады

АСТАНА. KAZINFORM — Hyundai Research Institute зерттеу институтының есебіне сәйкес, биыл Оңтүстік Кореяға келген шетел азаматтарының саны 20 миллионнан асады деп күтіліп отыр, деп хабарлайды Yonhap.

Hyundai Research Institute дайындаған деректерге сәйкес, биыл елге келетін шетелдік туристер саны 20 миллионнан асады деген болжам бар — бұл өткен жылғы 16,37 миллион адаммен салыстырғанда айтарлықтай өсім.

Сонымен қатар есепте Оңтүстік Корея шетелдік туристердің шығындарынан 20,2 миллиард АҚШ доллары көлемінде табыс табады деп күтілетіні көрсетілген.

Бұған дейін Оңтүстік Корея шетел азаматтары үшін электрондық миграциялық карта жүйесін енгізген болатын.

Сондай-ақ қазақстандықтардың Оңтүстік Кореяда заңды түрде жұмысқа орналасуға мүмкіндік беретін оңтүстіккореялық «Employment permit system» жүйесіне қосылу процесі биыл аяқталуы мүмкін екені айтылды.