Ортағасырлық Сарайшық қалашығын су тасқынынан қорғау күшейтілген режимде жүргізіліп жатыр
АТЫРАУ. KAZINFORM – Атырау облысындағы ортағасырлық Сарайшық қалашығын су тасқынынан қорғау күшейтілген режимде жүргізіліп жатыр.
Махамбет ауданының әкімі Қайрат Нұрлыбаевтың айтуынша, Сарайшық ауылындағы ортағасырлық қалашықты тасқын судан қорғау шаралары қолға алынған.
«Ортағасырлық Сарайшық қалашығының аумағындағы ежелгі жерлеу орындарын су басу қаупіне байланысты бөгет салу ісіне Қорғаныс министрлігінің 200-ге жуық әскери қызметшісі және Төтенше жағдайлар министрлігінің 51 қызметкері тартылды. Мұнда Жайық өзенінің жағалауын нығайту жұмыстары екі ауысымда жүріп жатыр. Бір ауысымда қорғаныс бөгетін салуға 100 сарбаз жұмылдырылған. Сарайшық ауылындағы жұмысқа әскери қызметшілерден бөлек әкімдік қызметкерлері де атсалысуда. Арнайы техникалар бөлінді», - дейді Қайрат Нұрлыбаев.
Оның айтуына қарағанда, ежелгі тарихи қалашық аумағын жарықтандыру жұмысы қоса жүргізіліп жатыр.
Еске сала кетсек, құтқарушылар мен әскерилер Махамбет ауданындағы Сарайшық ауылына көмекке келгенін хабарлаған болатынбыз.
