Өзбекстан халқына ауа ластанатыны ескертілетін болады

АСТАНА. KAZINFORM – Өзбекстан 1 наурыздан бастап шаңды дауыл тұрып, атмосфералық ауадағы ұсақ дисперсті бөлшектер белгіленген нормасынан асып кеткен жағдайда халықты хабардар ететін болады, деп жазады Uza.

Бұл Өзбекстан президенті Шавкат Мирзиеевтің 2024 жылдың 21 ақпанындағы «Өзбекстан-2030» Стратегиясын жүзеге асырудың мемлекеттік бағдарламасын бекіткен жарлығында көзделген.
Осы күннен бастап жүрек-қан тамырлары және тыныс алу жолдары ауруларымен ауыратын адамдарға, сондай-ақ денсаулығы ауаның ластануына сезімталдығы жоғары басқа да азаматтарға қажетті профилактикалық іс-шаралар туралы жүйелі түрде ақпарат берілуі тиіс.

Жарлықта, сондай-ақ, 1 наурыздан бастап 500 шаршы метр және одан да көп құрылыс алаңдарында шаң мен құм бөлшектерінің ауаға көтерілуіне жол бермеу бойынша міндетті талаптар енгізу көзделген.