Өзбекстанда алтын құймалар мен монеталардың құны рекордтық деңгейде қымбаттады

ТАШКЕНТ. KAZINFORM – Бүгін Өзбекстан банктеріндегі алтын құймалар мен монеталардың бағасы қымбаттап, бұған дейін тіркелген тарихи көрсеткіштен асып түсті, деп хабарлайды Kazinform агенттігінің Ташкенттегі меншікті тілшісі Әлихан Асқар.

Өзбекстан Орталық банкінің дерегіне сай, қазір бір грамм алтын 915 мың сумға (32 567 теңге) бағаланып отыр. Бұл 26 наурыздағы құнға қарағанда 0,9%-ға қымбат. Ал салмағы 5 грамм болатын алтын құйманың бағасы 4,575 млн сумға (162 мың теңге) тең.

Алайда, қымбат металдың әлемдік нарықтағы құны өткен аптамен салыстырғанда біршама арзандады. 20 наурызда алтынның унциясы (31,1 грамм) 2 200 доллар болса, бүгінде ол 2 180 доллардың шамасында.

Айта кетейік, аталған қымбат металдың бағасы наурыз айының басында бірнеше рет рекордтық көрсеткішке жеткен болатын. Атап айтқанда, бір апта ішінде 5 грамм алтын құймасы бірден 200 мың сумға (7 153 теңге) қымбаттады, ал 12 наурызда оның құны алғаш рет 4,5 млн сумға (160 мың теңге) жетті.