Париж Олимпиаданың ашылу салтанатына қалай дайындалып жатыр
ПАРИЖ. KAZINFORM — Бүгін төрткүл дүние көз тіккен Париж Олимпиадасының алауы тұтанады. Қазір Францияда ойындардың ашылу салтанатына байланысты қауіпсіздік шаралары күшейтіліп, көп көшелерде қоғамдық көлік қозғалысына шектеу қойылған.
Полицейлер мен волонтерлерді қоса алғанда 80 мыңға жуық адам қоғамдық тәртіпті қадағалап жүр.
Ал Сена өзенінің жағалауындағы спортшылар шеруі өтетін аумақтарға өту шектелген. Тек арнайы қызмет өкілдері ғана кіріп-шығып жатыр.
Қаладағы біршама метро бекеттері жабық тұр.
Қазір бізде бар ақпарат көздеріне сенсек, бүгін Париж аспанынан ұшақтардың ұшуына да қатаң тыйым салынған көрінеді.
Жалпы, 45 мың полицей, 10 мың сарбаз және 2 мың жеке күзет қызметкері Сена өзенінде, оның жағалауы мен айналасындағы ескерткіштер бойымен өтетін шерудің қауіпсіздігін қамтамасыз етпек.
Себебі Жазғы Олимпиада ойындары тарихында алғаш рет ашылу салтанаты стадионда емес, табиғат аясында, Сена өзенінің бойында өтпек.
Спортшылар шеруінде әр делегация жеке-жеке қайықпен өзен бойымен жүріп өтеді.
Шеру 6 шақырым жолды жүріп өтіп, Трокадероның алдында аяқталады. Онда салтанатты іс-шараның қалған бөлігі және шоу өтеді.
Салтанатты шараны еліміздің жанкүйерлері тұңғыш рет бес бірдей телеарнадан тікелей эфирде көре алады.
Олар — Qazaqstan, Qazsport, «Хабар», «Ел арна» және Jibek Joly телеарналары. Осы аталған бес арна ойынның ресми ашылу салтанатын бірдей уақытта тікелей эфирде көрсетеді.
Естеріңізге сала кетсек, Олимпиада ойындарының ашылу салтанатында еліміздің көк байрағын Қазақстан құрамасының капитаны, боксшы Асланбек Шымбергенов пен жеңіл атлет Ольга Сафронова ұстап шығады.
Франция астанасы XXXIII жазғы Олимпиада ойындары 26 шілде мен 11 тамыз аралығында өтеді.
Оған әлемнің 205 елінен 10 500 спортшы қатысады.
