Паркингті көлік жуатын орынға айналдырып жатыр — депутат тұрақ мәселесін көтерді

АСТАНА. KAZINFORM — Мәжіліс депутаты Жигули Дайрабаев ірі қалаларда паркингтің мақсатын өзгертіп, көлік жуу немесе техникалық қызмет көрсету стансасына айналдырып жатқанын айтты.

— Тұрғын үй қатынастары туралы заң жобасында паркингтің конструкциялық бөлігін немесе функцияналдық қызметін өзгертуге тыйым салынатыны айтылған. Осы заңның 2-бабында көппәтерлі тұрғын үйлердің паркингі арнайы айқындалған автокөліктерді қоюға арналған тұрақ. Қазір Астана және басқа мегополис қалаларда көпқабатты тұрғын үйлердің айналасында көлік қоятын орындардың жеткіліксіздігі бұрынғыдан да өзекті. Сонымен қатар паркингтер көліктерді қоюға ғана арналғанына қарамастан меншік иелері паркингті толық қайта жөндеуден өткізіп, жабдықтап, автотұрақ тапшылығын туғызуда. Осылайша олар паркингтің мақсатын өзгертіп, көлік жуу немесе техникалық қызмет көрсету стансасына айналдырып жатыр. Паркингті ауыстыруға қатысты ұстанымдарыңыз қандай? , — деген сауал қойды Мәжіліс депутаты Жигули Дайрбаев жалпы отырыста. 

Халық қалаулысының сауалына Өнеркәсіп және құрылыс вице-министрі Қуандық Қажкенов жауап берді. 

— Жобалық-сметалық құжаттама бойынша сараптамадан өткен автотұрақтар жобада қарастырылған нормативтік талаптарға сәйкес қолданылуы тиіс. Егер тұрғын үй кешенінде кемінде 100 автотұрақ қарастырылса, ол заң аясында іске асырылуы керек. Қайта жабдықтауға және өзгертуге жол берілмейді. Электр қуаты стансасына келетін болсақ, оның талаптары қолданыстағы заңнамада бұрыннан қарастырылған. Электр қуаты стансасын қамтамасыз ету үшін қажетті техникалық шарттар болуы тиіс. Сондай-ақ аталған талаптар мемлекеттік органдардың техникалық регламентінде қарастырылған, — дейді министрдің орынбасары.

Айта кетсек, елімізде соғыс жағдайында жертөле, қосалқы үй-жай және жерасты паркингтерін «бомбадан қорғайтын орын» ретінде пайдалану нормасы бекітілді.