Парламент Сенатының Төрағасы Ресей Федерациясының Қазақстандағы Елшісі Михаил Бочарниковты қабылдады
АСТАНА. Қазанның 1-і. ҚазАқпарат - Бүгін Парламент Сенатының Төрағасы Қасым-Жомарт Тоқаев Ресей Федерациясының Қазақстандағы Төтенше және Өкілетті Елшісі Михаил Бочарниковты қабылдады, деп хабарлайды палатаның баспасөз қызметі.
Кездесу барысында екіжақты қатынастарды, оның ішінде парламентаралық өзара іс-қимылды одан әрі нығайту мәселелері талқыланды.
М.Бочарников Ресей Федерациясы Федералды Жиналысы Федерация Кеңесінің Төрағасы С.Мироновтың Қазақстанға алдағы ресми сапары туралы төрағаны хабардар етті.
Дипломаттың айтуынша, биылғы желтоқсанның 8-9-ы күндері болатын сапар барысында Сенат пен Федерация Кеңесі арасындағы ынтымақтастық жөніндегі топтың төртінші отырысын өткізу жоспарланып отыр.
«Біз алдағы сапарға зор маңыз береміз»,-деді Қ.Тоқаев. Ол Қазақстан мен Ресей Федерациясының жоғары заң шығарушы органдары арасындағы ынтымақтастықты одан әрі нығайту үшін алдағы шаралардың маңызын атап өтті.
