Павлодар облысы Мичурино ауылында болған өрттен екі бала қаза тапты
ПАВЛОДАР. ҚазАқпарат - Бүгін таңғы сағат 4-тер шамасында Павлодар облыстық ТЖД кезекшілік бөліміне Павлодар ауданы Мичурино ауылында шыққан өрт туралы хабар келіп түсті, деп хабарлады ТЖД баспасөз қызметінен.
6 бөлмелі үй жанды, шатырдың кей бөлігі бұзылып, жалын көлемі 80 шаршы метр болатын жапсыра салынған қораға өткен.
Өртті ауыздықтауға 12 өрт құтқарушысы мен 4 техника жұмылдырылды. Оқиға орнынан екі баланың мәйіті табылды. Алдын ала болжам бойынша олар 2003 және 2009 жылы туғандар.
Оқиға орнында үйінділерді байқау жұмыстары жалғасуда. Жылжымалы өрт сөндіру-техникалық зертхана жұмыс істеуде.
