Перизат Қайрат жауап беруден бас тарту құқығын таңдады - Қаржылық мониторинг агенттігі

АСТАНА. KAZINFORM – Күдікті Перизат Қайраттың ісі бойынша материалдар 100 томнан асқан. Бұл туралы Қаржылық мониторинг агенттігі төрағасының орынбасары Жеңіс Елемесов мәлім етті.

Бүгін Сенаттың жалпы отырысынан кейін тілшілер күдікті Перизат Қайрат тергеу амалдары кезінде не себепті жауап беруден бас тартқанын сұрады.

- Күдікті ретінде ол жауап беруден бас тарту құқы бар. Ол өзінің осы құқығын пайдаланып, жауап беруден бас тартты... Оның бірнеше адвокаты болды және бұған дейін олар ауысып отырды. Қазір жаңа адвокаты қылмыстық істің материалдарымен танысып жатыр, - деді Ж. Елемесов Сенаттың жалпы отырысынан кейін тілшілер сұрағына жауап бере отырып.

Оның айтуынша, қылмыстық іс бойынша материалдар 100 томнан асқан.

Бұған дейін хабарланғандай, Перизат Қайраттың ісін тергеу барысында келтірілген шығын 3,5 млрд теңге сомасында анықталды.

Аталған іс бойынша күдікке Перизаттың анасы да іліккен.